5 ліпеня 2022 г. у Нацыянальным цэнтры прававой інфармацыі прайшоў семінар «Лінгвістычны кантроль якасці нарматыўных прававых актаў».
У мерапрыемстве прынялі ўдзел супрацоўнікі ўпраўлення рэдакцыйна-выдавецкіх работ НЦПІ, упраўлення інфармацыйна-прававога і лінгвістычнага забеспячэння дзейнасці Адміністрацыі Прэзідэнта Рэспублікі Беларусь НЦПІ, аддзела кантрольна-пратакольнай работы і выпуску прававых актаў канцылярыі Прэзідэнта Рэспублікі Беларусь, галоўнага экспертна-прававога ўпраўлення Апарата Савета Міністраў Рэспублікі Беларусь, аддзялення лінгвістычнай экспертызы рэдакцыйнага ўпраўлення Сакратарыята Палаты прадстаўнікоў Нацыянальнага сходу Рэспублікі Беларусь.
Удзельнікі семінара абмеркавалі пытанні арганізацыі правядзення лінгвістычнага кантролю якасці заканадаўчых дакументаў, праблемы лінгвістычнага і камп’ютарнага афармлення прававых актаў, закранулі іншыя праблемныя моманты ў працы.
У семінары таксама прынялі ўдзел супрацоўнікі Інстытута мовазнаўства імя Якуба Коласа. Дырэктар інстытута І. Л. Капылоў выступіў з дакладам аб змяненні прозвішчаў у беларускай і рускай мовах, адзначыў праблемныя моманты і сучасныя тэндэнцыі ва ўжыванні онімных адзінак, а таксама адказаў на шматлікія пытанні прысутных. Даклад выклікаў шчырую зацікаўленасць, паколькі праблема афармлення ўласных імёнаў надзвычай актуальная ў сферы справаводства.
Загадчык аддзела лексікалогіі і лексікаграфіі А. М. Лапцёнак паведаміла аб дзейнасці рабочай групы па перакладзе кодэксаў Рэспублікі Беларусь на беларускую мову, акцэнтаваўшы ўвагу на падыходах да выбару міжмоўных адпаведнікаў тэрмінаадзінак.
