22 сакавіка 2022 г. у Цэнтральнай бібліятэцы імя Янкі Купалы вядучы навуковы супрацоўнік аддзела гісторыі беларускай мовы Цэнтра даследаванняў беларускай культуры, мовы і літаратуры Нацыянальнай акадэміі навук Беларусі доктар філалагічных навук прафесар Мароз Валянціна Канстанцінаўна правяла для навучэнцаў Мінскага фінансава-эканамічнага каледжа і чытачоў бібліятэкі  майстар-клас на тэму “Янка Купала пра беларускую мову”. Гэта сустрэча арганізавана ў рамках цыкла навукова-папулярных лекцый, уключаных у план мерапрыемстваў Нацыянальнай акадэміі навук Беларусі па патрыятычным выхаванні ў 2022 г. (першае мерапрыемства – навукова-папулярная лекцыя “Праект стагоддзя беларускай гуманітарыстыкі: «Гістарычны слоўнік беларускай мовы»” –  было прымеркавана да Міжнароднага дня роднай мовы і праведзена 23 лютага б.г.).

У выдавецтве «Беларуская навука» выйшаў з друку першы выпуск зборніка «Сучасныя праблемы анамастыкі». Змешчаныя ў выданні навуковыя артыкулы айчынных і замежных даследчыкаў закранаюць розныя віды анамастычнай лексікі і адлюстроўваюць сучасны стан беларускай і ў цэлым славянскай навукі аб уласных імёнах. Падаецца таксама падборка матэрыялаў да слоўнікаў.

Зборнік адрасуецца спецыялістам у галіне анамастыкі (мовазнаўцам, гісторыкам, географам), краязнаўцам, выкладчыкам, студэнтам і школьнікам, а таксама ўсім, хто цікавіцца пытаннямі паходжання і функцыянавання ўласных імёнаў.

Набыць выданне можна ў «Акадэмкнізе» (пр. Незалежнасці, 72). Кошт асобніка – 30,91 р.

Сучасныя праблемы анамастыкі : зб. навук. арт. / НАН Беларусі, Цэнтр даслед. беларус. культуры, мовы і літ., Ін-т мовазнаўства імя Якуба Коласа ; навук. рэд. І. Л. Капылоў. – Мінск : Беларус. навука, 2022. – Вып. 1. – 404 с.

24 сакавіка 2022 г. перад супрацоўнікамі Інстытута мовазнаўства імя Якуба Коласа з дакладам на тэму “Варыянтнасць у гетэрагенным гарадскім маўленні (на матэрыяле запісаў у г. п. Хоцімску)” выступіла Наталля Васільеўна Яненка, кандыдат філалагічных навук, дацэнт кафедры беларускага мовазнаўства Беларускага дзяржаўнага ўніверсітэта, у рамках навуковай стажыроўкі.

Даклад суправаджаўся відэапрэзентацыяй. Наталля Васільеўна паведаміла пра мэту, задачы, аб’ект і прадмет праведзенага даследавання гетэрагеннага гарадскога маўлення ў г.п. Хоцімску Магілёўскай вобласці; засяродзіла ўвагу на кваліфікацыі матэрыялу, на відах вар’іравання ў маўленні інфармантаў і тыпах моўных пераменных. 

28 лютага 2022 г. у Дзяржаўным музеі гісторыі беларускай літаратуры адбылася ІІІ-я навукова-практычная канферэнцыя «Беларусь, ты збудавана з беларускіх слоў!», прымеркаваная да Міжнароднага Дня роднай мовы.

Для ўдзелу ў канферэнцыі было пададзена 60 заявак вучняў
VІІI-XІ класаў з Мінска і Мінскай вобласці. Арганізацыйны камітэт канферэнцыі адабраў 50 работ. Канферэнцыя праходзіла ў дзвюх секцыях: літаратуразнаўчай і краязнаўчай.

27 лютага 2022 г. у царкве святой роўнаапостальнай княгіні Вольгі г. Мінска малодшым навуковым супрацоўнікам аддзела гісторыі беларускай мовы Інстытута мовазнаўства імя Якуба Коласа Цэнтра даследаванняў беларускай культуры, мовы і літаратуры НАН Беларусі С.М. Макітрук была праведзена гульня “Гаворым па-беларуску”, прысвечаная Міжнароднаму дню роднай мовы.

21 лютага ва ўсім свеце адзначаецца дзень роднай мовы. І ў гэты дзень ужо па традыцыі адбылася сустрэча вучоных з Інстытута мовазнаўства імя Якуба Коласа Цэнтра даследаванняў беларускай культуры, мовы і літаратуры Нацыянальнай акадэміі навук Беларусі І.У. Будзько, вядучага навуковага супрацоўніка, кандыдата філалагічных навук, і Э.В. Ярмоленка, вядучага навуковага супрацоўніка, кандыдата філалагічных навук, з замежнымі студэнтамі Беларускага нацыянальнага тэхнічнага ўніверсітэта.

І.У. Будзько распавяла студэнтам аб значэнні слова белы і аб розных версіях паходжанні назвы нашай краіны – Беларусь.

23 лютага 2022 г. вучоныя Цэнтра даследаванняў беларускай культуры, мовы і літаратуры Нацыянальнай акадэміі навук Беларусі (філіял “Інстытут мовазнаўства імя Якуба Коласа”) Наталля Вікенцьеўна Паляшчук, загадчык аддзела гісторыі беларускай мовы, і Эльвіра Валер’еўна Ярмоленка, вядучы навуковы супрацоўнік аддзела гісторыі беларускай мовы, прынялі ўдзел у святкаванні Міжнароднага дня роднай мовы ў Цэнтральнай бібліятэцы імя Янкі Купалы горада Мінска.

21 лютага 2022 года ў Міжнародны дзень роднай мовы старшы навуковы супрацоўнік аддзела гісторыі беларускай мовы Інстытута мовазнаўства Цэнтра даследаванняў беларускай культуры, мовы і літаратуры НАН Беларусі Перавалава Наталля Юр’еўна правяла інтэрактыўныя заняткі “Напісанае застаецца: мова выданняў Францыска Скарыны” ў дзіцячай бібліятэцы № 2 г. Мінска. Вучні 4 “Б” класа сярэдняй школы № 73 г. Мінска падчас заняткаў даведаліся пра гісторыю ўзнікнення кнігі і кнігадрукавання, пазнаёміліся з факсімільным выданнем Бібліі Францыска Скарыны, паспрабавалі чытаць і пісаць на старабеларускай мове. З вялікай цікавасцю ўсе прысутныя азнаёміліся з рукапісным помнікам старабеларускага пісьменства 16 ст. “Арыстоцелевы вароты”, параўналі яго з друкаванымі выданнямі Францыска Скарыны.